Dirección, guión, montaxe e deseño de cartel e créditos para a miña primeira longametraxe. Un filme de non ficción arredor da miña relación coa miña tía desde o íntimo e familiar. Producido por Serea Films e coa axuda ao talento audiovisual galego da Axencia Galega das Industrias Culturais (AGADIC).

SINOPSE

As persoas somos o que somos por quen nos inspira. Desde que nacemos, constrúen as nosas personalidades, intereses e ambicións os reflexos da xente á que admiramos, das nosas referencias.

Bruno leva moito tempo cunha espiña cravada: non lembra case nada de quen máis lle influíu na súa vida. A súa tía Xela morreu cando el tiña 5 anos e só lle quedan dela as memorias doutras persoas. É por iso que, dezaoito anos despois, Bruno decide transitar as caras e lugares que viviron a súa tía para dar luz a este conflito interno a través da primeira herdanza que lle deixou: o impulso creativo.